வாரம் ஒரு கவிதை

விட்டு விடு எங்களை …

வாகனம் இல்லா சாலைகள் …மாணவர்
இல்லா கல்வி சாலைகள் !
அலுவலர் இல்லா அலுவலகங்கள்… வெறிச்சோடிய 
கடற்கரை ! 

விமானம் இல்லாத விமான நிலையம் …ரயில் 
இல்லாத ரயில் நிலையங்கள் ! வழிபாட்டு 
தலங்களுக்கும் போட்டு விட்டாய் நீ ஒரு பூட்டு !

கோயிலில் இருக்கும் கடவுளும் இன்று 
மருத்துவ மனையில் …மருத்துவர் உருவில் !

ஊரையே அடக்கி விட்டாய் நீ ..அடங்காமல் 
ஆடிய மனிதரும் முடங்கி விட்டார் வீட்டுக்குள்ளே !

கொரானா …நீ மட்டும்தான் இன்னும் அடங்காமல் 
ஆட்டம் காட்டுகிறாய் உலகுக்கு !

விட்டு விடு எங்களை … போதும் உன் ஆட்டம் !
ஓரு தட்டு தட்டி மனிதா நீ ஒரு தூசு என் முன்னால் 
என்று சொல்லாமல் சொல்லி விட்டாய் !

ஓடி விடு நீ இப்போதே …வீட்டை விட்டு நாங்கள் 
வெளியே வர வேண்டும் …எங்கள் உலகை 
புதிய உலகை பார்க்க வேண்டும் …பறவைகளின் 
குரல் கேட்கவேண்டும் பழையபடி !

இனிமேல் யாரையும் ” நீ ஒரு தூசு  என் முன்னால் “
என்று சொல்ல மாட்டோம் ! விட்டு விடு எங்களை 
வாழ விடு எங்கள் குலத்தை ! 

கந்தசாமி நடராஜன்

வாரம் ஒரு கவிதை

 வீடு கிடைக்குமா ஒரே ஒரு நாளைக்கு ?


ஒரு நாள் முழுதும் வீட்டுக்குள்ளே 
இருக்கணுமாம் …வெளியே யாரும் 
வரக்கூடாதாம் ஒரு நாள் ! 

எனக்கு வீடே இல்லை …நடைபாதைதான் 
என் வீடு !
அந்த ஒருநாள் மட்டும் ஒரு வீடு கிடைக்குமா 
எனக்கு  நானும் ஒரு வீட்டுக்குள் முடங்கிக்கொள்ள ?

கேட்கிறான் ஒரு நடைபாதை வாசி …
என்ன பதில் சொல்ல அவனுக்கு ? 

கந்தசாமி நடராஜன்

வாரம் ஒரு கவிதை !

அடக்கி வாசி மனிதா நீ !

++++++++++++++++++++

நீ அங்கு செல்லாதே …நீ  இங்கு 
வராதே ! … சொல்லாமல் 
கொள்ளாமல் பரவும்  வைரஸால் 
மிரண்டு போய் இருக்குது உலகம் !
அரண்டு போய் இருக்கிறான் மனிதன் !

என் கையில் எல்லாமே அடக்கம் 
என்னை மீறி என்ன நடக்கும் 
என்னும் இறுமாப்பு மனிதனுக்கு !

இயற்கை இன்று போட்டு விட்டது 
எல்லோருக்கும் ஒரு வாய் காப்பு !
கோடிட்டு காட்டி விட்டது இயற்கை 
தன் கோபத்தை ! 

புரிந்து நடந்து கொள்  மனிதா 
உன் எல்லைக்கோடு என்ன என்று 
தெரிந்து நடந்து கொள் !

இயற்கையின் எல்லைக் கோட்டை நீ 
தாண்டினால் உன் நாட்டின் எல்லைக் 
கோடும் கூட மூடப்படும் உனக்கு !

இயற்கையின் சீற்றத்தின்  ஒரு சிறு 
பொறிதான் நீ காண்பது இன்று !
அடக்கி வாசி மனிதா நீ இனிமேல் !

கந்தசாமி நடராஜன்

வாரம் ஒரு கவிதை

மனித நேயம் என்னும் மருந்து 


கண்ணுக்குத் தெரியாமல் பரவுவது 
வைரஸ் …புதுப் புதுப் பெயருடன் !
கண்ணுக்குத் தெரிந்தே பரவுவது 
வாட்ஸாப் வைரல் !

தெரியாமல் பரவும் வைரஸை விட 
தெரிந்தே பரவும் வைரலின் 
வேகமும் தாக்கமும் கொடுமை !

தெரியாமல் வளரும் வைரஸை 
தடுக்க முடியாது நம்மால்..ஆனால் 
தெரிந்தே பரப்ப விடும் வதந்தி 
என்னும் வைரலைத் தடுக்க 
முடியும் நம்மால் !…மனித 
நேயம் என்னும் மருந்து கொண்டு !
வதந்தி என்னும் வைரலைத் தடுப்போம் நாம் 
எடுப்போம் ஒரு சபதம் இன்று அதைத் தடுக்க 
மனித நேயத்தின் பெயரில் ! 

கந்தசாமி நடராஜன்

வாரம் ஒரு கவிதை

அது அந்த காலம் !!!+++++++++++++++++

அரச மரம் சுற்றி அடி  வயிற்றைத் 
தொட்டுப் பார்த்த பெண்கள் காலம் 
ஒரு காலம் ! அது அந்த காலம் !

அரை கிலோ மீட்டர் நடந்து விட்டு 
அருகம் புல் ஜூஸ் குடித்து முடித்த
கையோடு அடி வயிறு தொட்டு தொந்தி

கரைந்து விட்டதா என்று ஆண்கள் பார்ப்பது 
இந்த காலம் !!!

கந்தசாமி நடராஜன்

கேள்வி எங்கே ?

கேள்வி எங்கே ? 

கேள்வி கேட்டால் பதில் கிடைக்கும் 
தலைப்பு கொடுத்தால் ஒரு 
கவிதை பிறக்கும் தன்னால் !
இரண்டுமே இல்லை என்றால் 
வறண்டு விடும் கவிதை கிணறு !
முரண்டு பிடிக்கிறேன் என்று 
நினைக்க வேண்டாம் !
பிறக்க வேண்டும் என்னுள் ஒரு 
கவிதை மீண்டும் ! 
கேளுங்க ஒரு கேள்வி என்னை 
கேட்டு மகிழுங்க என் பதிலை 
ஒரு கவிதை வடிவில் ! 

கந்தசாமி நடராஜன்

வாரம் ஒரு கவிதை …பொங்கல் வாழ்த்து

 

 

       
 


வண்ண வண்ண அட்டைகள் 
எண்ணங்களின் சிதறல்கள் 
வாழ்த்து பரிமாற்றம் அன்பு உள்ளங்களுக்கு 
பொங்கலுக்கு பொங்கல் ! 

ஒரு இல்லத்துக்கு அட்டை எத்தனை 
வரவு என்று கணக்கு வேறு ! 
பொங்கல் வாழ்த்து அட்டைக்கு நன்றி 
நவில அஞ்சல் அட்டையும் உண்டு !

கை பட எழுதிய இரண்டு அட்டைகளும் 
இன்று தேடினாலும்  கிடைக்காத பொக்கிஷம் !
அது ஒரு கனாக் காலம் !

காலத்தின் கோலம் இன்று ” ஹாப்பி 
பொங்கல் ” என்று  எந்திர மயமான 
குறும் செய்தி எல்லோருக்கும் அலைபேசியில் !

மனம் திறந்து சொல்கிறேன் நான் இன்று 
நெஞ்சம்  நிறைந்த வாழ்த்துக்களை தொலைத்து 
விட்டு நிற்கிறோம் என்று ! 

சொல்லுவோம் வாழ்த்துக்களை மனம் 
நிறைய …மின் அஞ்சல் மூலமாவது !
வாழ்த்து பெறுபவரின் நெஞ்சம் குளிரும் 
வாழ்த்தும் நம் மனமும் நிறையும் !

பொங்கலோ பொங்கல் ! 

கந்தசாமி நடராஜன்