வாரம் ஒரு கவிதை ….” யாருக்கு என் வாக்கு ? “

யாருக்கு என் வாக்கு ?
=====================
யாருக்கு என் வாக்கு ?  குழப்பத்தில் நான் !
இந்த கட்சியுடன் அந்த கட்சி கூட்டணி
அந்த கட்சியுடன் இன்னொரு கட்சி கூட்டணி !
நேற்று வரை இரண்டு கட்சியும் எதிர் எதிர்
திசையில் …இன்று தேர்தல் கூட்டணி என்னும்
போர்வையில்  ஒரே அணியில் !
தாக்கு தாக்கு என்று தாக்கிக் கொண்டவர் எல்லாம்
வாக்கு வங்கியில் வேட்டையாட நிஜம் மறைத்து
ஒரே மேடையில் நின்று வாக்கு கேக்கும் அவலம் இன்று !
இது என்ன கூட்டணியா ….இல்லை குழப்ப
அணியா ?  இல்லை நம்மை எல்லாம்
குழப்பி,  குழம்பிய குட்டையில் மீன் பிடிக்கும்
கூட்டமா ?
இந்த குழப்பம் எனக்கு மட்டுமா …இல்லை
உங்கள் எல்லோருக்குமா ?  யோசிப்போம்
பொறு”மை” யாக …நம் விரலில் வைக்கும்
“மை ” வெறும் “மை” அல்ல ! அது சொல்லும்
உண்”மை ” ! சேர்க்கும் பெரு”மை”… நம்
ஜனநாயகத் திருவிழாவுக்கு !
காத்திருக்கட்டும் குழப்பவாதிகள் விடை தெரியும்
வரை… அவர் கண் இ”மை”க்காமல் !
K. நடராஜன்
April  1  2019

 

Advertisements

வாரம் ஒரு கவிதை …” தேர்தல் திருவிழா “

தேர்தல் திருவிழா
================
சாமி ஊர்வலம் தேர் திருவிழாவில்!  ஆசாமிகள்
ஊர்வலம் தேர்தல் திருவிழாவில் ! நீயும்
நானும் எல்லோருமே சாமிதான் அந்த ஆசாமிகள்
கண்ணுக்கு …கும்பிடு பல கிடைக்கும்  உனக்கும்
எனக்கும் எப்போதும் இல்லாத ஒரு பணிவுடன் !
நானும் நீயும் தான் சாமி …கும்பிடு போடும்
அந்த ஆசாமிகளுக்கு ! கும்பிடு அத்தனையும்
வாங்குவோம் …தப்பு இல்லை !
தம்பிடி மட்டும் வாங்க வேண்டாம் …ஆசாமிகள்
என்ன சொன்னாலும் !
சாமி நாம் தான் இந்த தேர்தல் திருவிழாவில் !
சாமி நானும் நீயும்தான்  வரம் கொடுக்க வேண்டும்
கும்பிடு போடும் ஆசாமி அத்தனை பேருக்கும் !
பாத்திரம் அறிந்து பிச்சை  போட வேண்டும் !
ஆசாமி தகுதி தெரிந்து அவருக்கு
போட வேண்டும் நம் வாக்கு !
வாக்கு நம் செல்வாக்கு  என்னும் சொல்
மறக்க வேண்டாம் நாம் ! இலவசத்தின்
பின்னால் ஓடி கொச்சைப் படுத்திக் கொள்ள
வேண்டாம் நம் செல்வாக்கை !
வரும் தேர்தல் திருவிழா நமக்கு ஒரு
பெரும் தேர்வு விழா !
வெற்றியோ தோல்வியோ அது அந்த
ஆசாமிக்கு !
வெற்றி  எனக்கும் உனக்கும் மட்டுமே
இருக்க வேண்டும் சாமி !
K.Natarajan
22/03/2019